’n Pint bier vir ’n pint bloed
2010-01-15 08:48
’n Pint bier vir ’n pint bloed.
Met dié transaksie mik ’n bloedbank in Tacoma, Washington, in die VSA daarna om meer eenhede bloed in te samel.
“Gee bloed, kry bier,” sê die Cascade Regional Blood Services op sy webwerf aan skenkers wat ’n bierkoepon kry in ruil vir hul bloed.
Dié bloedinsamelingsveldtog word vandag by ’n kroeg en volgende Vrydag by ’n padkafee gehou.
“Dit is ’n goeie manier om vennootskappe te sluit met plaaslike ondernemings,” het mnr. Dan Schmitt van dié bloeddiens gesê.
Die Suid-Afrikaanse Nasionale Bloeddiens (SANBD) sê op sy webwerf vrywillige bloedskenkers wat nie vir hul bloed betaal word nie en gereeld bloed skenk, is die veiligste skenkers.
Die SANBD sê navorsing in talle lande toon dat mense wat bloed gratis en sonder enigefinansiële vergoeding gee, min rede het om inligting weg te steek oor hul lewenstyl wat hulle tydelik of permanent ongeskik kan maak om bloed te skenk.
“Hul primêre motivering is om ander mense te help en nie om enige persoonlike voordeel te kry nie, behalwe die bevrediging dat hulle weet hulle het gehelp om iemand se lewe te red.”– Verslaggewer
- Beeld