Woeste storm tref Kalifornië
2010-01-21 15:41
Los Angeles – Honderde inwoners regoor Kalifornië is Woensdag gewaarsku om hulle huise te ontruim nadat ‘n woeste storm dié area getref het.
Dit is die derde storm wat hierdie gebied sedert Maandag getref het. Vrese het nou ontstaan dat verskeie modderstortings en vloede moontlik kan plaasvind nadat erge veldbrande die plantlewe verlede jaar uitgewis het.
Volgens die hoof van die Los Angeles-brandweerdiens, Michael Freeman, is hulle nou in ‘n resies teen Moeder Natuur gewikkel.
“As Moeder Natuur wen, sal daar geen kans wees vir nooddienswerkers om mense te red nie,” het Freeman gesê.
Inwoners is gemaan om so gou moontlik hulle huise te ontruim nadat hulle in kennis gestel is.
Selfs die stad se burgemeester, Antonio Villaraigosa, het gepleit dat inwoners vir hulle eie veiligheid hulle huise moet ontruim.
“Ons vra vir mense se samewerking. Ons wil hê hulle moet hierdie waarskuwings ernstig opneem,” het Villaraigosa gesê.
–Sapa