Woede oor video van Chinese seuntjie in sneeu
2012-02-08 13:10
Beijing – ‘n Tuisgemaakte video waarop ‘n vierjarige Chinese seuntjie deur sy ouers gedwing word om byna kaal deur die sneeu te hardloop in ysige weer in New York, het op die internet versprei en aanlyn-woede ontlok.
Die pa probeer glo sy seun leer om sterk en gesond te wees en die beeldmateriaal het debatte ontlok oor die “Chinese”-styl van harde ouerskap.
In die video hardloop die klein seuntjie in dik sneeu na sy pa wat hom afneem, terwyl hy net skoene en ‘n onderbroek aanhet. Met tye huil hy verskriklik en smeek sy pa om hom op te tel.
Beide sy ouers sê verskeie kere vir hom om in die sneeu te lê.
Die video, wat deur sy pa op die internet gelaai is, is deur duisende mense op verskeie video-webwerwe gekyk en het erge woede ontlok.
Die pa is van Nanjing afkomstig.
“Ek stem nie saam hiermee nie... Ons moet vir kinders ‘n gelukkige jeug gee, daardie aaklige ouers sê hulle doen dit vir hul kind se eie beswil, maar ek dink hul doel is net sodat hulle in die toekoms kan spog,” het een internetgebruiker gesê.
“Ek ondersteun dit regtig nie, arme kind, laat die kind se ma die pa toe om net te doen wat hy wil?” het ‘n ander persoon op Sina se gewilde weibo-diens gesê.
Chinese verslaggewers wat ‘n onderhoud met die pa gehad het, het uitgevind dat die familie verlede maand in New York op vakansie was toe die video geneem is. Die temperatuur was -13 °C.
Die pa – ‘n entrepreneur – het probeer om sy seun op te lei om sterk te wees nadat hy twee maande prematuur gebore is en aan verskeie gesondheidsprobleme ly.
Die volgende video kan sensitiewe kykers ontstel.
– Volg Nuus24 op Twitter
- Sapa - AFP