Woede ná sewejarige by skool in Indië verkrag is
2013-01-15 09:21
Video - Woede oor bendeverkragting in Indië
Terwyl die saak teen 'n groep mans wat 'n jong Indiese vrou na bewering verkrag het, voortduur, wys betogers steeds hul woede.
KYK
Panaji – ‘n Sewejarige meisie is in ‘n skoolbadkamer in die Indiese vakansiestaat Goa verkrag, het die polisie Dinsdag gesê.
Die voorval het gelei tot betogings en die inhegtenisneming van haar skoolhoof.
Die verkragting is Maandag in Vasco da Gama aangemeld en dit het gelei tot ‘n reuse-soektog na die beskuldigdem, wat glo in sy vroeë twintigs is.
“Die meisie is tydens pouse in die skool se badkamer verkrag,” het ‘n polisiebeampte aan AFP gesê op die voorwaarde van anonimiteit.
Hy sê die toilet was langs die hoof se kantoor by die Deepvihar Hoërskool, wat ook ‘n laerskool het.
Duisende mense het Maandagaand by die skool saamgekom en aangedring op die inhegtenisneming van die skoolhoof en die verkragter, wat nog op vrye voet is.
Die hoof, wie se naam nie bekendgemaak is nie om sodoende die meisie se identiteit te beskerm, is aanvanklik aangehou en later in hegtenis geneem weens beweerde nalatigheid, het die polisiebeampte gesê.
Die inhegtenisneming kom nadat die bendeverkragting van ‘n student op ‘n bus in Nieu-Delhi verlede maand gelei het tot landswye betogings en erge woede oor skokkende gevalle van seksuele aanranding.
Vyf mans en ‘n tiener is aangekla van die verkragting en moord op die 23-jarige vrou, wat 13 dae later in ‘n hospitaal in Singapoer dood is weens haar beserings.
‘n Polisieman is ook Maandag in Goa in hegtenis geneem nadat hy daarvan aangekla is dat hy sekswerkers mishandel het. Volgens die sekswerkers het hy en twee ander polisiemanne – wat nou geskors is – hulle seksueel uitgebuit in ruil daarvoor dat hulle stilbly oor die werkers se beroep.
– Volg Nuus24 op Twitter
- Sapa - AFP
