Woede in Indië oor verkragting op bus

2012-12-19 12:01

Nieu-Delhi – Wetmakers, regtegroepe en burgerlikes is Indië is woedend nadat 'n vrou deur ses mans in 'n bus in Nieu-Delhi verkrag is.

Dié woede is ongewoon in 'n land waar aanvalle teen vroue dikwels geïgnoreer word en die skuldiges weinig aan die pen ry.

Opposisie-wetmakers het Woensdag buite die parlement betoog en geëis dat die vrou se vermeende verkragters die doodstraf opgelê moet word.

Betogers het ook opgeruk na Nieu-Delhi se polisiekwartiere en daadwerklike optrede teen die verkragters geëis. Ontstoke studente het padblokkades regoor die stad opgestel.

Die polisie het gesê ses mans het die 23-jarige mediese student verkrag en haar metgesel aangerand voor hulle Sondag uit die bus gegooi is. Vier mans is intussen in hegtenis geneem in verband met die voorval.

– Volg Nuus24 op Twitter

- Sapa - AP