Withuis sê nie jammer oor dodelike Navo-aanval
2011-12-02 10:58
Washington – Die Withuis gaan nie om verskoning vra vir die Navo-lugaanval in Pakistan waarin 24 soldate dood is nie.
Die Withuis het die idee afgeskiet om om verskoning te vra en hou vol dat ‘n ondersoek na die mans se dood steeds aan die gang is.
“Ek, wat namens die Withuis en die president praat, het namens hom, die administrasie, die Amerikaanse mense, meegevoel oor die tragiese sterftes uitgespreek,” het Jay Carney, woordvoerder vir die Withuis, aan verslaggewers gesê.
"Dit was ‘n tragedie."
Hy en ander Amerikaanse amptenare het egter nie om verskoning vir die voorval gevra nie.
Carney het Maandag ook gesê die naweek se sterftes was ‘n “tragedie.”
“Ons neem dié saak baie ernstig op,” het hy gesê.
Die sterftes het woede in Pakistan uitgelok en Islamabad genoop om sy alliansie met die VSA te hersien.
“Ons betreur daardie dapper Pakistanse diens-lede wat hul lewens verloor het,” het die woordvoerder gesê.
Volgens New York Times het die VSA se departementsbeamptes gepleit dat pres. Barack Obama ‘n amptelike verklaring van berou aan die Pakistanse mense moet uitreik.
Luidens die koerant, wat anonieme beamptes aangehaal het, het die Pentagon die idee afgeskiet.
Volgens die Pentagon was ander beamptes soos Hillary Clinton, minister van buitelandse sake, se verklaring voldoende.
Carney meen die Withuis het nie ‘n amptelike verskoning gemaak nie, aangesien owerhede nog die voorval ondersoek.
Volg Nuus24 op Twitter
- Sapa - AFP