'Wil jy braai of dalk selfmoord pleeg?'
2010-02-05 07:25
Taipei. – Supermarkte en 24-uur-geriefswinkels in Taiwan het ingestem om deel te wees van die regering se teen-selfmoordveldtog. In dié land is daar ’n selfmoord bykans elke twee uur.
“Ses supermark- en vier geriefswinkelgroepe het tot die veldtog ingestem,” het Cheng Shu-hsin van die departement van gesondheid gister gesê.
“Die Rxmart – met 500 supermarkte – het sy rekenaarstelsel aangepas sodat wanneer ’n klant net houtskool koop, die kasregister ’n waarskuwing sal flits,” het sy gesê.
“Die kassier sal dan vir die klant vra: ‘Koop jy die houtskool vir ’n braai? Hoekom koop jy nie vleis nie?’ Indien die klant selfmoordgedagtes uitspreek, sal die kassier onmiddellik die teen-selfmoord-hulplyn skakel.”
Die brand van houtskool – wat giftige gasse vrystel – is een van die mees algemene selfmoordmetodes in Taiwan.
Die ander supermarkte en geriefswinkels gaan hul eie maniere vind om deel te neem aan die veldtog.
Taiwan het een van die hoogste selfmoordsyfers in Asië. In 2008 het 4 128 mense hul lewens beëindig. Die departement van gesondheid het ’n 24-uur-hulplyn begin en het dié nommer en waarskuwings op houtskoolverpakking laat druk.
– Sapa-dpa