Wet teen gays in Uganda dalk binnekort aanvaar

2012-11-12 15:04

Kampala – Uganda se parlementêre speaker het gesê dat 'n wetsontwerp wat gays teiken voor die einde van die jaar goedgekeur kan word, ten spyte van internasionale kritiek oor dié konsepwet.

Rebecca Kadaga het Maandag aan die nuusagentskap AP gesê dat die wetsontwerp, wat aanvanklik ook die doodstraf vir verskeie homoseksuele dade voorgestel het, voor die einde van die jaar aanvaar sal word omdat die mense van Uganda daarop aandring.

Kadaga sê sy het Vrydag reeds by 'n byeenkoms van aktiviste die nuus aangekondig. Sy het ook gesê aktiviste by die byeenkoms het die "gevaar" wat gays vir Uganda inhou, beklemtoon.

Pepe Julian Onziema, ‘n Ugandese aktivis wat teen die wetsontwerp gekant is, sê die druk om die wet te aanvaar is baie frustrerend.

Pres. Barack Obama het die wetsontwerp al as afskuwelik beskryf en verskeie Europese lande dreig met sanksies teen Uganda as dit wel aanvaar word.

– Volg Nuus24 op Twitter
 

- Sapa - AP