Weste ontsteld oor predikant se doodstraf
2011-10-05 07:10
Den Haag – Die protes in die Weste teen die doodstraf wat ’n Iranse hof aan ’n Christelike predikant, eerw. Youcef Nadarkhani (35), opgelê het, is besig om momentum te kry.
Luidens berigte in die Europese media het Nadarkhani hom op 19-jarige ouderdom tot die Christendom bekeer. Hy is nou predikant in die Kerk van Iran, ’n los groepering Protestante wat in huise bymekaarkom om te aanbid omdat hulle nie kerkgeboue mag hê nie.
Nadarkhani het in 2009 beswaar gemaak teen ’n nuwe Iranse wet wat alle skoolkinders – hy het self twee op skool – verplig om daagliks uit die Koran te lees en Allah te aanbid. Hy is daarna in hegtenis geneem en voor die hof gedaag op aanklag van geloofsafvalligheid en pogings om ander Moslems afvallig te maak.
Sy regsverteenwoordigers het aangevoer dat die Iranse wet dit nie verbied nie. Die regters het die verweer op grond van ’n fatwa – ’n teologiese verklaring – van wyle ajatolla Roeholla Chomeini verwerp en hom ter dood veroordeel.
Sy appèl is ook verwerp, maar die uitvoering van die vonnis is uitgestel. Hy is meegedeel dat die vonnis versag sal word as hy sy geloof versaak.
Begin vandeesmaand het die Iranse staatsmedia berig dat Nadarkhani nie op grond van geloofsversaking veroordeel is nie, maar weens verkragting en afpersing – klagte wat volgens sy advokaat nooit in die hof aan hom gestel is nie.
Verskeie Westerse regeringsleiers het hulle die laaste dae skerp oor die saak uitgelaat.
Die Amerikaanse minister van buitelandse sake, Hillary Clinton, het gesê haar land “staan vir ’n regering wat die menseregte en vryheid van almal wat in Iran woon, respekteer”, terwyl haar Britse eweknie, William Hague, hulde aan Nadarkhani vir sy dapperheid gebring het en ’n beroep op Iran gedoen het om die vonnis tot niet te maak.
Die Iranse ambassadeur in Berlyn is deur die kantoor van die bondskanselier, dr. Angela Merkel, ontbied met die “dringende eis” dat die vonnis nie voltrek word nie.
Die Italiaanse minister van buitelandse sake, Franco Frattini, het dit “’n skande, die ontkenning van die regstaat” genoem.
– Volg Nuus24 op Twitter
- Die Burger