Joernaliste looi oudredakteur van poniekoerant
2011-07-11 12:16
Londen – Versoeke van topbestuur by die mediamaatskappy News International dat werknemers nie geniepsige boodskappe in die laaste uitgawe van die Britse poniekoerant News of the World plaas nie, het op dowe ore geval.
Die koerant se werknemers, nou almal werkloos, het suutjies bitsige boodskappe, gemik op die voormalige redakteur Rebekah Brooks, in die blokraaisel van die laaste uitgawe ingewerk, berig die Daily Mail.
Leidrade soos “Brook”, “stink”, “katastrofe” en “digitale beskerming” is in die blokraaisel ingesluit.
Die antwoorde “gedoente” en “tert” het netjies in die blokkies gepas.
Die bekende Cryptic Crossword het ook leidrade soos “misdryf” en “reeks opnames” ingesluit.
The Telegraph beweer die leidraad "woman stares wildly at calamity" verwys na 'n foto van Brooks wat die koerant se hoofkwartier in Londen in 'n haas verlaat. Die antwoord op die leidraad is "ramp".
News of the World het Saterdag sy laaste uitgawe voorberei ná 'n meeluisterskandaal dit ná 168 jaar gedwing het om te sluit.
Die laaste uitgawe het Sondag verskyn as ‘n oorsig van die koerant se joernalistieke prestasies.
– Lees meer hier.
– Volg Nuus24 op Twitter.