Werk begin om Arafat-raaisel op te los

2012-11-13 12:30

Ramallah – Palestynse owerhede het Dinsdag begin om die oorskot van die land se voormalige leier, Yasser Arafat, op te grawe as deel van ‘n moordondersoek, het ‘n bron na aan die familie aan AFP gesê.

“Hulle het vandag begin om beton en stene van Arafat se mausoleum te vewyder en dit sal hulle sowat 15 dae neem om die graf oop te kry,” het die bron gesê.

Franse, Sweedse en Russiese kundiges sal Arafat se oorskot forensies toets weens bewerings dat hy vergiftig is met die radioaktiewe stof polonium.

Die toetse sal glo aan die einde van die maand begin.

“As gevolg van Arafat se status sal niemand onder enige omstandighede toegelaat word om sy oorskot af te neem nie.”

Arafat is op 11 November 2004 in ‘n militêre hospitaal naby Parys dood. Franse deskundiges kon nie vasstel wat die oorsaak van sy dood was nie.

Talle Palestyne is oortuig dat sy dood deur Israel bewerkstellig is.

Franse aanklaers het in Augustus ‘n moordondersoek van stapel gestuur ná berigte dat polonium op van Arafat se besittings gevind is.

– Volg Nuus24 op Twitter
 

- Sapa - AFP