Weermagoffisiere kap 'perverse' plan
2010-11-11 08:19
Den Haag - ’n Groep afgetrede hoë Britse offisiere het ’n skerp aanval op hul regering gedoen weens die drastiese besnoeiings op verdedigingsuitgawes. Hulle noem die besnoeiings “strategies en finansieel pervers”.
Die offisiere het hul mening in ’n brief aan die Londense Times uiteengesit.
Die sterk bewoorde brief is ’n aanduiding van die intense woede wat die besnoeiings van £8,5miljard (sowat R93,59miljard) in die Britse weermag veroorsaak het.
Die offisiere skryf die feit dat Brittanje vir die volgende dekade geen operasionele vlieg- dekskip sal hê nie, beteken dat Argentinië “prakties uitgenooi word om ’n nasionale vernedering soortgelyk as die verlies van Singapoer op ons af te dwing” betreffende die Falkland-eilande. (Die besetting van Singapoer in 1942 deur Japan was ’n geweldige slag vir Brittanje in die Tweede Wêreldoorlog.)
Die offisiere sê die afwesigheid van ’n operasionele vliegdekskip tot 2019 berus op die veronderstelling dat Brittanje tien jaar vooraf ’n waarskuwing sal hê om hom op ’n bedreiging voor te berei. “Die laaste tienjaar-waarskuwing, gedryf deur die tesourie, het ons in die 1930’s byna ons vryheid teenoor Hitler gekos.”
Die minister van verdediging, dr. Liam Fox, het die offisiere se kritiek verwerp. Die planne gaan voort.
Volg Nuus24 op Twitter
- Die Burger