Weermag 'verneder' gevangenes vir inligting
2010-10-28 09:11
Den Haag - Die Britse weermag lei die ondervraers van gevangenes op om metodes toe te pas wat die Geneefse Konvensie verbreek, berig The Guardian.
Die koerant het opleidingsmateriaal in die hande gekry wat daarop dui dat daar van ondervraers verwag word om gevangenes te verneder, onseker te maak, te disoriënteer, uit te put en paniekbevange te maak.
Gevangenes moet byvoorbeeld gedwing word om heeltemal kaal tydens die ondervraging te wees. ’n Ander drukmiddel is om hulle te blinddoek.
Daarby word die ondervraers aangemoedig om die gevangenes vir lang tye in uiters ongemaklike posisies te hou en in pikdonker selle op te sluit waar absoluut geen lig inkom nie. Gevangenes se weerstand kan ook deur slaapgebrek gebreek word, lui die voorskrifte.
Gevangenes moet ook gedreig word dat hulle onbepaald in dié omstandighede aangehou sal word as hulle nie saamwerk nie. Die ondervraging moet plaasvind op plekke waartoe die media geen toegang het nie.
Die Geneefse Konvensie verbied “fisieke of morele dwang” om inligting te kry.
Britse koerante het onlangs berig van ’n ondersoek na die dood van Baha Mousa, ’n hotelwerker in Basra, Irak, wat in 2003 dood is ná “taktiese ondervraging”. Mousa het gestik deurdat ’n soldaat op sy rug gekniel en die kap oor sy kop skerp teruggepluk het. ’n Lykskouing het 93 verskillende beserings by hom uitgewys.
- Die Burger