‘Web-bedrieër’ spoedig vasgetrek
2009-07-22 11:34
Franklin (Tennessee). – ’n Verdagte wat internetbedrog uit Suid-Afrika gepleeg het, is in die VSA vasgetrek toe ’n verkeerspolisielid hom van die pad getrek het omdat hy te vinnig gery het.
’n Polisiebeampte het Vrydagaand naby ’n winkelsentrum in Nashville ’n motor voorgekeer wat te vinnig gery het en gevind die bestuurder word al sedert 1999 gesoek weens bedrog.
’n Tennessee-koerant het berig mnr. Walter Wright, die bestuurder, is 68 jaar oud.
Die FBI en Interpol het hom as ’n internasionale voortvlugtige gelys.
Die koerant het berig Wright is in aanhouding en sal na verwagting binnekort aan Suid-Afrika uitgelewer word om hier vervolg te word. Daar kon teen druktyd nie vasgestel word of hy ’n Suid-Afrikaner is nie. – AP