Ware liefde so skaars soos lewe in ruimte?
2010-01-21 09:54
Londen – ’n Londense ekonoom kan dalk die bewys wees dat die liefde nie luister na statistieke nie.
Peter Backus, ’n vierdejaarstudent en lektor in ekonomie aan die Universiteit van Warwick, bereken sy kanse om ware liefde in Londen te vind is byna net so skraal soos om ruimtewesens in die Melkweg te vind – sowat 0,00034%, om meer presies te wees.
Backus het dieselfde Drake-formule, genoem na die afgestorwe sterrekundige Frank Drake, gebruik om sy kanse op ’n warm romanse te bereken.
Dié formule word deur wetenskaplikes gebruik om die potensiële aantal beskawings in die Melkweg te bepaal.
Die 31-jarige Backus, wat op ’n boot bly, het gesê hy is nie juis vol fiemies oor ’n liefdesmaat nie – sy moet net in Londen woon, tussen 24 en 34 jaar oud wees en universiteitsopleiding hê.
“Ek probeer nie snobisties, elitisties of moeilik wees nie,” het hy gesê oor sy voorkeur vir vroue met universiteitsopleiding.
“Almal het voorkeure. Ek dink net ons sal meer gemeen en ’n beter kans op ’n suksesvolle verhouding hê as sy op universiteit was.”
Sy kanse krimp verder omdat Backus skat net 5% van die vroue wat aan dié maatstawwe voldoen, sal vir hom aantreklik wees.
Dit beteken volgens hom daar is sowat 10500 vroue in Brittanje wat aan sy vereistes voldoen.
Dié syfer is net bo die 10 000 potensieel gevorderde beskawings wat volgens die Drake-formule in die Melkweg kan bestaan.
“Dit beteken verder net 0,14% van alle Londenaars en 0,017% van die Britse bevolking voldoen aan my vereistes,” het Backus gesê.
En soos hulle sê – “it takes two to tango”.
As dié ekonoom se droomvroue dieselfde voorkeure as hy oor hul ideale man het, dan is die kans dat hy iemand sal vind wat dieselfde oor hom sal voel as hy oor haar ’n skamele 0,00034%.
“Daar is met ander woorde net sowat 26 vroue in die ganse Brittanje met wie ek ’n wonderlike verhouding sal kan hê,” het Backus gesê.
“Op ’n tipiese aand uit in Londen is daar dus ’n 0,00034%-kans dat ek een van dié spesiale vroue sal ontmoet.
“Dit is ’n kans van 1 uit 285000 – nie juis inspirerend nie,” het hy gesê.
Die liefde kan egter blykbaar alles, insluitend uiters swak kanse, oorwin.
Sedert Backus sy artikel oor berekenings van die kanse op liefde geskryf het, het hy met sy buurvrou, Rose, begin uitgaan.
Sy is die regte ouderdom, sy het ’n universiteitsgraad en sy bly ook op ’n boot – wat is die kans?
– Reuters