Waaghals wil dié rekord laat (vry)val
2012-02-11 08:30
Los Angeles. – ’n Oostenrykse valskermspringer beoog om die wêreld-vryvalrekord later vanjaar te verbeter deur van ’n hoogte van 37 000 m uit ’n heliumballon te spring.
Met dié sprong hoop Felix Baumgartner (41) om boonop die eerste mens te word wat sonder ’n vliegtuig deur die klankgrens breek.
Baumgartner sal tydens die duiselingwekkende vryval van die boonste stratosfeer bykans vyf en ’n half minute lank val voordat hy sy valskerm sal laat ontplooi.
Die poging sal na verwagting die rekords vir sowel die hoogste as langste vryval en die hoogste bemande ballonvlug verbeter.
Baumgartner sal later vanjaar, wanneer die weer gunstig is, in ’n spesiale heliumballon wat deur die Red Bull Stratos-span gebou word, by Roswell in die Amerikaanse deelstaat Nieu-Mexiko opstyg.
Die Red Bull Stratos-span het vandeesweek op sy webwerf, www.redbullstratos. com, gesê Baumgartner se sprong in baie dun, suurstofarme lug, byna op die grens van die ruimte, sal ’n eksperiment wees wat waardevolle inligting sal oplewer oor hoe om mense veilig in soortgelyke toestande te plaas.
Daar word verwag hy sal aan die begin van sy sprong, waar die lug baie dun en die windweerstand baie laag is, snelhede van meer as 1 110 km/h bereik en sodoende die klankgrens breek. Soos hy val, sal die lug digter word en sy snelheid afneem.
Die projekspan het gesê die spesiale drukvaste ruimtepak wat vir hom ontwikkel is, sal ’n nuwe standaard vestig vir beskermende kleredrag vir baie hoë hoëspoed-valskermspronge wat vir toekomstige lugmagvlieëniers, ruimtevaarders en selfs ruimtetoeriste van waarde kan wees.
– Volg Nuus24 op Twitter
- Sapa - AFP