Vyf sterf toe helikopter in berg vasvlieg
2010-08-18 13:33
Bangkok - ‘n Helikopter wat aan die regering behoort het tydens ‘n storm in die noorde van Thailand in ‘n berg vasgevlieg, het owerhede Woensdag bekend gemaak.
Na bewering was daar vyf persone aan boord die helikopter toe die voorval plaasgevind het. Senior beamptes van die departement van omgewingsake is glo dood.
“Reddingswerkers het Woensdag op die toneel opgedaag en vyf lyke in die wrak van die helikopter gevind. Die helikopter het na bewering reeds Dinsdag neergestort,” het lt. kol. Sawaroj Intarawongchai, polisiewoordvoerder, gesê.
“Dit wil blyk of die helikopter in die berg vasggevlieg het weens swak sigbaarheid,” het hy gesê.
Die proses om die slagoffers uit te ken sal ietwat langer neem omdat die lyke heeltemal vermink is toe die helikopter in die berg vasgevlieg het.
Volg Nuus24 op Twitter.
- SAPA