Vyf sterf toe handgranaat karaoke-klub tref
2011-09-21 11:10
Manila – Vyf mense is dood en sewe ander gewond toe ‘n handgranaat by ‘n besige karaoke-klub in die Filippyne ontplof het, het die polisie Woensdag gesê.
Volgens die polisie het twee aanvallers Dinsdagaand met ‘n motorfiets na die klub in La Paz gery. Daarna het een van die aanvallers 'n granaat na die kroeg gegooi. La Paz is ‘n klein landboudorp wat noord van die Filippynse hoofstad, Manila, geleë is.
Robert Calacal, ‘n ondersoekbeampte in La Paz, sê die motief vir die aanval is onbekend. Niemand is tot dusver in hegtenis geneem nie.
“Sulke aanvalle gebeur nie sommer in hierdie dorp nie,” het Calacal aan AFP gesê.
Calacal sê die ontploffing het tydens die kroeg se besigste tyd in die aand plaasgevind.
Hy sê vyf Filippynse mense is in die aanval dood. Volgens ‘n nasionale polisiewoordvoerder in Manila is sewe mense beseer.
Die karaoke-klub was ‘n klein kroeg langs ‘n snelweg, waar arm inwoners soos boere, konstruksiewerkers en klerke dikwels gekuier het.
Volg Nuus24 op Twitter.
- Sapa - AFP