Vyf sterf toe brand in Parys-woonstelblok woed
2011-04-14 13:27
Parys – Vyf mense is dood en talle ander is beseer toe ‘n massiewe brand in ‘n woonstelblok in Parys uitgebreek het, het reddingsbeamptes gesê. Altesaam ses van die beseerdes is in ‘n ernstige toestand.
Brandbestryders het aan AFP gesê dat vier van die slagoffers dood is nadat hulle by die vensters uitgespring het.
Die vyfde persoon het in die gebou in die noordooste van Parys doodgebrand.
Twee brandbestryders en ses kinders is in die brand beseer.
Die oorsaak van die brand, wat Donderdagoggend omstreeks 03:00 op ‘n stel trappe uitgebreek het, word ondersoek.
Dit het sowat 300 brandbestryders geneem om die brand teen 05:30 onder beheer te kry.
Volg Nuus24 op Twitter.
- Sapa - AFP