Vyf sterf in ontploffing by onwettige distilleerdery

2011-07-14 10:10

Londen – Altesaam vyf mans is dood nadat ‘n ontploffing in ‘n industriële gebou in die sentrale deel van Engeland plaasgevind het, het die polisie gesê.

Volgens die polisie in die Lincolnshire-distrik het die ontploffing Woensdag by ‘n nywerheidseenheid in Boston gebeur. Dié dorp is 180 km noord van Londen geleë.

Daar is berigte wat sê die gebou is onwettiglik gebruik om vodka te maak.

Volgens Sky News het bure beweer die groep was besig om ‘n onwettige distilleerdery te bestuur. Daar word beweer dat die groep trekarbeiders was.

Een man is na ‘n hospitaal geneem nadat hy ernstige beserings in die ontploffing opgedoen het.

Ooggetuies het ‘n ontploffing aangemeld en gesien hoe rook by een van die geboue uitkom, lui ‘n BBC-berig.

Volg Nuus24 op Twitter.
 

- Sapa - AP