Vrou wat troeteldiere doodmartel tronk toe
2011-02-24 22:00
Riverhead, New York (Amerika) - ‘n Vrou het Donderdag beken sy het haar kinders en dosyne troeteldiere mishandel, soms deur honde en katte dood te martel voor haar jong dogters.
‘n Aanklaer meen die vrou se huis was ‘n “konsentrasiekamp vir diere”.
Sharon McDonough het in die hof skuldig gepleit op 13 aanklagtes teen haar wat met diere- en kindermishandeling verband hou.
Distriksregter C. Randall Hinrichs van Suffolk, New York, het gesê McDonough sal op 28 Maart gevonnis word tot ‘n maksimum van twee jaar tronkstraf. Sy word sedert haar inhegtenisneming in Desember 2009 aangehou. Dié tyd sal in ag geneem word met haar vonnissing.
Geen familielede het die vonnissing bygewoon nie. Dit sluit haar ses dogters in.
McDonough het verskeie katjies en honde doodgemaak. Sy het die dooie katte in die vullis gestop en 42 honde in die agterplaas van haar huis begrawe.
Die kinders is nie net mishandel nie, maar is gedwing om die dood van die troeteldiere te aanskou, het die aanklaer gesê.
Die gebeure is onder die aanklaers se aandag gebring deur McDonough se volwasse seun, wat uit die huis getrek het.
- Volg Nuus24 op Twitter
- Sapa - AP