Vrou vir drie jaar in lykshuis aangehou

2013-01-25 11:07

Beijing – ‘n Chinese vrou is vir drie jaar in ‘n verlate lykshuis aangehou nadat sy in 'n strafkamp moes werk omdat sy gekla het oor die manier waarop haar man behandel is, het die staatsmedia Vrydag berig.

Sanitasiewerkers het wag gehou oor Chen Qingxia by die fasiliteit in die noordoostelike provinsie Heilongjiang, het die Global Times berig.

Haar probleme het in 2003 begin toe haar man gevonnis is om in ‘n strafkamp te werk nadat hy uit kwarantyn probeer ontsnap het tydens ‘n Sars-uitbreking.

Nadat hy bevry is, het sy lyf tekens van kneusing getoon en sy geestestoestand het agteruit gegaan. Chen het gevolglik na Beijing gereis om protes aan te teken by hooggeplaaste amptenare oor die manier waarop hy behandel is.

Sy is gevolglik gedwing om 18 maande in ‘n strafkamp te werk – ‘n algemene straf vir mense wat teen die regering protes aanteken. Nadat sy haar vonnis uitgedien het, is sy in die lykshuis aangehou.

Sy is nou “in ‘n rolstoel en haar gesondheid het erg agteruit gegaan,” het die Global Times berig. Skisofrenie is by haar man gediagnoseer ná sy vrylating en hy is uiteindelik na ‘n hospitaal vir pasiënte met geestesversteurings gestuur.

Plaaslike beamptes het onderneem om haar te vergoed vir haar lyding, het die koerant berig.

– Volg Nuus24 op Twitter

- Sapa - AFP