Vrou vind matroos se brief in bottel
2010-03-02 15:27
Tapei – ’n Vrou van Taiwan wat vroeër vanjaar ’n bottel met ’n boodskap van ’n matroos af opgetel het, het Dinsdag gesê sy sien daarna uit om hom eendag te ontmoet.
Hsiao Wei-chen, ’n winkelklerk op die eiland, Orchid aan die suidooste kus van Taiwan het dié groen bottel op die strand opgetel toe sy die middag gaan stap het.
Die boodskap kom glo van ‘n Amerikaanse seevaarder af wat die bottel in die see gegooi het.
Die brief binne-in die bottel is deur Oliver Hickman geskryf.
Hy het die ontdekker van die boodskap gesondheid en geluk toegewens. Hy het ook gesê die wêreld is vol pret, liefde en prag.
Hickman het die bottel in 2008 naby Wake-eiland in die Stille Oseaan gegooi.
Hsiao het gesê sy het ‘n brief aan Hickman teruggeskryf, maar het nog niks van hom gehoor nie.
Die United Daily News het Dinsdag vir haar laat weet hulle het met Hickman in kontak getree, wat gesê het hy is bly die brief is deur Hsiao gevind.
Hickman het Hsiao se foto op sy blog geplaas en geskryf:
"’n Boodskap in ‘n bottel is vanaf ‘n skip in die see gegooi en het op die strand van die eiland, Orchid uitgespoel. Dit het glo groot nuus op die klein eiland gemaak.”
Dit is die tweede keer wat Hickman se boodskap in ‘n bottel gevind is.
Hickman het aan dpa per e-pos gesê hy is al vir die afgelope sewe jaar ‘n seeman op vragskepe.
Hy skryf elke keer 'n nuwe brief wanneer hy op 'n nuwe skip werk.
“Ek wonder altyd wie die brief sal kry en watter taal hulle praat. Nou het ek al ‘n paar antwoorde op van my vrae ontvang.”
Hickman het nie gesê of hy ‘n besoek aan Orchid-eiland gaan aflê om vir Hsaio, wat getroud is en twee kinders het, te gaan ontmoet nie.
"Ek het altyd geglo die see bring geluk en verrassings. Nou het dit gebeur en ek voel soos die gelukkigste persoon op aarde."
-Sapa-dpa
