Vrou vervals swangerskap, gryp baba
2012-01-10 10:10
Wellington – ‘n Vrou van Nieu-Seeland wat haar swangerskap vervals het, is in hegtenis geneem nadat sy ‘n baba by ‘n hospitaal wou ontvoer, het die polisie Dinsdag gesê.
Neha Narayan is in hegtenis geneem nadat sy op pad na die hospitaal se parkeerterrein met die baba betrap is. Haar kêrel het daar gewag om haar huis toe te neem. Hy was onder die indruk dat dit hul baba was.
Narayan het nege maande lank voorgegee dat sy swanger is voor sy vir haar kêrel gevra het om haar by Auckland se Middlemore hospitaal af te laai omdat sy moet kraam, het Ana-Mari Gates-Bowey, ‘n polisiewoordvoerder, gesê.
In die hospitaal kon Narayan (24), van Fiji-Indiese afkoms, vrylik in die kraamsaal rondloop.
Op ‘n gegewe tyd het sy ‘n baba vasgehou wat sy glo getroos het. Later het ‘n personeellid van die hospitaal ‘n Indiese baba vir haar gegee om vas te hou omdat sy geglo het Narayan is die ma, het Gates-Bowey gesê.
Narayan het toe glo na die parkeerterrein geloop waar haar kêrel en ‘n ander persoon vir haar gewag het. Albei was onder die indruk dat sy wel swanger was, het Gates-Bowey gesê.
Die baba se ouers het gesien hoe Narayan met hulle kind wegloop en van die personeel bewus daarvan gemaak.
“Op pad uit die hospitaal, terwyl sy ‘n twee dae oue Indiese baba by haar gehad het wat sy uit die kraamsaal geneem het, het ‘n verpleegster haar gestop en gevra om terug te gaan,” het Gates-Bowey gesê.
Die polisie is gebel en Narayan is van ontvoering aangekla.
Sy is intussen op borgtog vrygelaat en sal later vandeesmaand in die hof verskyn.
– Volg Nuus24 op Twitter.
- Sapa - AFP