Vrou tien jaar lank in badkamer toegesluit
2012-01-26 17:43
Palestinië – 'n Een-en-twintigjarige Palesteinse vrou het aan owerhede gesê sy was tien jaar lank deur haar pa in hul badkamer toegesluit en kon net saans uitkom om hul huis skoon te maak.
Volgens 'n maatskaplike werkster wat die saak hanteer, het Baraa Melhem se pa aan haar gesê "mense is monsters".
Die polisie het Melhem Saterdag uit die klein badkamer in die Wesoewer-dorp Qalqilya gered nadat hulle 'n anonieme wenk ontvang het.
Haar pa, wat Israeliese burgerskap het, is gearresteer en aan die owerhede in Israel oorhandig. Hy sal Woensdag in die hof verskyn, het 'n polisiewoordvoerder gesê.
Melhem het tydens 'n radio-onderhoud gesê toe sy 11 jaar oud was het haar pa haar in die toilet toegesluit. Hy het haar nie toegelaat om skool te gaan of om haar ma te sien, van wie hy geskei is, nie.
Sy is met 'n knuppel en metaaldraad geslaan en slegs een kombers gegee om haar warm te hou, het Hala Shreim, die maatskaplike werkster gesê.
Volgens 'n verklaring wat deur die Palesteinse polisie uitgereik is, het die pa aangevoer dat 'n "familiedispuut" daartoe gelei het dat hy sy dogter opgesluit het en haar hoofsaaklik net brood gegee het om te eet.
Melhem se pa het ook haar hare en wenkbroue geskeer en haar toegelaat om slegs een maal per maand te stort.
Hy het haar ook elke oggend om 01:00 uit die badkamer laat kom om die huis tot 04:00 skoon te maak.
Melhem is intussen met haar ma herenig.
– Volg Nuus24 op Twitter.
- Reuters