Vrou skenk geboorte in lykswa
2009-12-02 08:43
Tegucigalpa – Carlos Rosa was soos gewoonlik besig om lyke by ‘n Hondurese lykshuis op te laai, toe hy skielik ‘n vrou moes help om geboorte te skenk.
Die onbekende swanger vrou het vanaf haar hut in ‘n plakkersdorp na ‘n hospitaal gestap toe sy onverwags voor die lykshuis in kraam gegaan het, het die El Heraldo-koerant berig.
Rosa het op die vrou afgekom waar sy op die grond gelê het en dadelik sy medewerkers geroep om te kom help. Die vrou is in die lykswa gelaai en Rosa het met haar na die hospitaal gejaag.
Maar die doodsmotor het in verkeer vasgesit en Rosa moes die vrou help om geboorte te skenk.
Die bevalling het sonder probleme verloop, ten spyte van die feit dat die naelstring nie dadelik geknip kon word nie.
Paramedici het ma en kind by die hospitaal bygestaan. Albei is in ‘n goeie toestand.
Beide ouers het glo besluit om die baba Rosa te noem, na die man wat gehelp het om haar die wêreld in te bring.
–Sapa