Vrou skend bekende skildery in Louvre

2013-02-08 17:43

Lille – Die Louvre-museum in Frankryk het Vrydag een van sy galerye tydelik gesluit nadat ‘n vrou ‘n ikoniese kunswerk deur die skilder Eugene Delacroix geskend het.

Die “onstabiele” vrou – wat na bewering psigiatriese probleme het – het met ‘n swart pen daarop geskryf.

Die 28-jarige vrou is deur ‘n werknemer vasgetrek nadat sy “AE911” op Liberty Leading the People geskryf het. Die skildery word tans in die Louvre se nuwe tak in die dorp Lens uitgestal. Daarna het die polisie haar in hegtenis geneem.

Dit is nog onduidelik wat sy met “AE911” bedoel het.

Die Louvre het in ‘n verklaring gesê ‘n spesialis restoureerder is na die museum gestuur. Die skade is glo nie te erg nie en kan maklik herstel word.

‘n Aanklaer in die nabygeleë dorp Bethune sê hy het gevra dat ‘n psigiatriese toets op die vrou gedoen word. Volgens hom lyk dit of sy “ongebalanseerd” is.

Dit is glo nog onduidelik hoekom sy die skildery geskend het.

– Volg Nuus24 op Twitter 

- Sapa - AFP