Vrou se redding ná 7 dae hoogtepunt vir SA span
2010-01-23 06:58
Erika Gibson
Port-au-Prince – Die mees bevredigende oomblik in ’n leeftyd.
Dis hoe soek-en-reddingswerkers van die Suid-Afrikaanse noodlenigingsgroep Gift of the Givers die gevoel beskryf het om ’n lewende persoon sewe dae ná die vernietigende aardbewing uit die puin te haal.
Die span, onder leiding van Ahmed Bham van die Noordwes-kollege vir mediese nooddienste in Orkney, het vandeesweek meer as 2½ uur lank gespook om Ema Zizi (60) uit te grawe.
Sy was in ’n kantoor van ’n Rooms-Katolieke katedraal in die sentrale deel van die stad onder ’n laag versterkte beton vasgekeer.
Die Suid-Afrikaners, wat die afgelope week nou saam met ’n Mexikaanse soek-en-redding-span gewerk het, het pas by die katedraal aangekom toe die Mexikane hulle kom roep het.
Hulle was besig met die identifikasie van dooies in die kerk toe een van hulle iemand flou “hallo, hallo” hoor roep het.
Die spanne het saamgewerk om haar posisie te bepaal en het daarna met die mees basiese toerusting versigtig deur die beton begin kap om haar te bereik.
“Toe ons ’n groot genoeg gat oopgemaak het, het ons haar gevra of sy kan beweeg,” het Bham vertel. “Ons kon sien sy is beseer, maar sy was by haar positiewe.
“Haar heup en een bobeen is gebreek en sy was erg ontwater. Haar eerste woorde toe ons haar uitgebring het, was ‘je t’aime’ (ek het jou lief). Sy het aanmekaar in Kreools gebabbel.
“Dit is die soort wonderwerke wat ons werk die moeite werd maak. Ons het haar agterna deur ’n tolk gevra hoe sy aan die lewe gebly het. Sy het vertel daar was ’n priester naby haar onder die puin.”
Zizi en die priester het mekaar moed ingepraat, maar hy is op die vyfde dag dood.
“Toe het sy gesange gesing en gebid. Sy het geen kos of water naby haar gehad nie. Die omstandighede van die redding was amper surrealisties, want rondom ons het die stropers die wêreld vol gehardloop sonder om die minste om te gee dat hulle die puin kan versteur.”
Volgens Bham is die normale maksimum tyd om lewendes ná so ’n ramp op te spoor sewe dae, maar wonderwerke gebeur tog.
Die oorweldigende doodsreuk in die strate van die hoofstad vertel dat die kanse op verdere wonderwerke inderdaad skraal is. Die ramp het waarskynlik vir eers sy kwota goeie nuus opgelewer.
- Beeld