Vrou sê jammer ná sy kat in asblik gooi
2010-08-26 06:04
Londen - 'n Britse vrou wat diereliefhebbers regoor die wêreld warm onder die kraag gehad het ná sy op kringtelevisie betrap is toe sy 'n kat in 'n asblik gooi, het Woensdag om verskoning gevra vir wat sy noem 'n oordeelsfout en sê die situasie het "buite beheer" geraak.
Aanlyn--beeldmateriaal van Mary Bale wat die vierjarige Lola in 'n asblik gooi en die deksel toemaak, het 'n herrie ontketen en polisie moes selfs wagte na haar huis stuur.
Die 45-jarige Bale het in 'n verklaring gesê sy is "baie jammer," maar het geen verduideliking gegee hoekom sy die kat in die asblik gegooi het nie.
"Ek kan nie verduidelik hoekom ek dit gedoen het nie. Dit is heeltemal buite karakter en my bedoeling was nie om Lola of haar eienaars skade aan te doen nie," het sy gesê.
- SAPA