Vrou probeer baba uit ma se maag steel
2010-05-10 20:55
Hong Kong – ‘n Hong Kong vrou wat ‘n hoogs swanger vrou se maag oopgesny het om haar baba te steel, is tot 10 jaar tronkstraf gevonnis.
Die ma het die aanval oorleef, maar die baba is ses maande later in die hospitaal oorlede.
Leung Sin-ting (27) het vir maande lank gemaak asof sy swanger is deur haar klere op te stop en ander vrouens se sonarskanderings aan haar man te wys.
Haar skoonma het haar blykbaar onder geweldige druk geplaas om swanger te word en sy het self 'n reeks miskrame gehad.
Leung Sin-ting het haar slagoffer op ‘n kindersorg webblad ontmoet en na haar huis toe gelok.
Sy het haar met ‘n koord verwurg tot die swanger vrou bewussyn verloor het.
Daarna het sy ‘n 10cm sny in die vrou se buik gemaak in ‘n poging om die baba te steel.
Die desperate vrou het egter moed verloor en kon nie die baba verwyder nie.
Sin-ting se man het met sy tuiskoms op haar en die bloeiende swanger vrou in hul kombuis afgekom.
Die baba het erge breinskade opgedoen en is ses maande later oorlede.
Sin-ting is skuldig bevind aan manslag aangesien dit nie haar bedoeling was om die baba te vermoor nie.
– Sapa