Vrou ontken McCann-verbintenis
2009-08-09 08:01
Melbourne - ‘n Australiese vrou het ontken dat sy enige kennis oor die verdwyning van die Britse kleuter Madeleine McCann het, nadat ‘n vriend haar as ‘n geheime getuie geïdentifiseer het.
“Ek het geen verbintenis tot daardie meisie nie,” het Judith Aron (53) Sondag aan Fairfax Media gesê vanuit haar huis in Melbourne.
Private speurders het verlede week gesoek na ‘n vrou wat soos Victoria Beckham lyk en met ‘n Australiese aksent praat. Dié vrou het glo drie dae nadat Madeleine in 2007 in Portugal verdwyn het, met ‘n Britse man buite ‘n kroeg in Barcelona gepraat.
Sy het na bewering vir die man gevra of hy daar was “om my nuwe dogter af te lewer”, voordat sy besef het sy praat met die verkeerde man.
Volgens Fairfax het ‘n vriend van Aron vir die polisie gesê Aron is die vrou wat in ‘n identikit uitgebeeld word. Dié identikit is deur ‘n Britse ondersoekspan uitgereik wat vir Medeleine se ouers werk.
Aron, wat vlot Spaans praat en ‘n vyf-jaarige dogter het, het gesê hulle het die verkeerde persoon beet. “Ek is 53 jaar oud en ek lyk beslis nie soos ‘n Spice Girl nie.”
- Sapa-AFP