Vrou ‘mislei om seks te hê’
2010-07-29 08:28
Jerusalem – Dis algemeen om te jok om seks te kry.
’n Getroude Palestynse man is egter tronkstraf van 18 maande opgelê omdat hy seks met ’n Israelse vrou gehad het nadat hy haar vertel het hy is Joods en enkellopend.
Binne ’n halfuur nadat Saber Qashor (30) die vrou in September 2008 ontmoet het, het hulle seks gehad in ’n kantoorgebou in die stad.
Twee maande later is hy aangekeer nadat die vrou hom aangekla het. Verlede week is hy tronkstraf en ’n boete van 10 000 sjekels (R19 100) opgelê vir “verkragting deur misleiding”, ’n oortreding uniek aan die Israelse regstelsel.
Dié straf is deur koerante en TV-kletsprogramme as rassisties bestempel.
- Sapa - AP