Vrou stamp Ferrari, Aston Martin, Porsche
2011-07-28 12:06
Monte Carlo – Drie vroue in ‘n potblou Bentley Azure van $363 000 (sowat R2.4 miljoen) het Woensdag in die prinsdom van Monaco die agterent van ‘n wit S-klas Mercedes-Benz lelik gekrap. Maar dit was slegs ‘n voorsmakie van wat ‘n gelukkige paneelklopper se aftreepaket sal kan word.
‘n Swart Ferrari F430 van sowat $186 000 (sowat R1.2 miljoen) het daarna die volle mag van die 2.7 ton sware Bentley op sy neus gevoel.
Toe, nes motorliefhebbers wat moes toekyk hul naels nie verder in hul oë kon inkrap nie, het daar ‘n Aston Martin Rapide van $228 000 (omtrent R1.5 miljoen) in die Azure se passasiersdeur vasgery.
‘n Porsche 911 het die kersie op die koek gesit en sy panele van $77 000 (sowat R513 000) ook lelik gebuig gekry.
'n Groot groep toeriste het met selfone in die hande foto's van die skade staan en neem.
Fotobewyse wat buite die Place du Casino, waar die peperduur ongeluk plaasgevind het, geneem is, bewys die vrou in die Bentley wou verby die wit Mercedes glip toe sy besef sy gaan hom tref.
Toe sy uitswaai, was sy in die Rapide se pad.
Die Porsche en die Ferrari het bloot onskuldig voor die Casino geparkeer gestaan.
– Lees meer hier en kyk ook na foto's van die ongeluk.
– Volg Nuus24 op Twitter.