Vrou gemartel, lewend verbrand oor 'heksery'

2013-02-07 09:36

Sydney – ‘n Jong ma in Papoea-Nieu-Guinee wat volgens haar gemeenskap by heksery betrokke was, is kaal uitgetrek, vol petrol gegooi en lewend voor ‘n skare mense, insluitend skoolkinders, verbrand.

Die vrou, wat deur The National-koerant as die 20-jarige Kepari Leniata geïdentifiseer is, is glo met ‘n strykyster gemartel, vasgebind, en aan die brand gesteek bo-op ‘n hoop vullis en buitebande.

Die gemeenskap het haar daarvan beskuldig dat sy heksery gebruik het om ‘n sesjarige seuntjie se dood te veroorsaak.

Die polisie kon glo nie ingryp nie omdat daar te veel mense was.

‘n Brandweervoertuig wat op die toneel aangekom het, is ook weggewys.

Volgens verslae het die vrou glo erken dat sy die seun vermoor het. Hy is Dinsdag dood na hy in 'n hospitaal opgeneem is met met maag- en borspyn.

Die polisie het gesê dat hulle die voorval as ‘n moord sal hanteer.

– Volg Nuus24 op Twitter 
 

- Sapa - AFP