Vrou byt aanvaller se pinkie af

2012-05-08 11:00

Tokio – ‘n Rower wat ‘n vrou in Japan aangeval het, het met leë hande en een vinger minder gevlug nadat die vrou sy pinkie afgebyt het.

Die 59-jarige vrou het terugbaklei nadat ‘n man haar handsak gegryp het toe sy by haar woonstel in die noordelike stad Sapporo aangekom het, het die polisie Dinsdag gesê.

Die vrou het agter die man, wat op ‘n fiets weggejaag het, aangehardloop. Sy het die sak uit sy hande gegryp en sy pinkie hard gebyt.

“Die slagoffer het die sak teruggekry en ‘n gedeelte van die verdagte se vinger afgebyt voordat hy op sy fiets gevlug het,” het ‘n plaaslike polisiewoordvoerder aan AFP gesê.

Plaaslike media berig dat die boonste derde van die man se vinger, wat volgens die vrou aan sy regterhand was, op die toneel gevind is.

‘n Polisiewoordvoerder het geweier om besonderhede te verskaf oor die vinger en of vingerafdrukke geneem is in ‘n poging om die aanvaller op te spoor.

Die verwydering van die boonste deel van die pinkie is 'n tradisionele vorm van boetedoening vir lede van Japan se Yakuza georganiseerde misdaadbendes.

Daar is geen aanduiding dat die vermeende aanvaller ‘n bendelid is nie.

– Volg Nuus24 op Twitter

 

- Sapa - AFP