Vrou bieg ná sy babalyke versteek
2010-07-29 16:41
Villers-au-Tertre, Frankryk - 'n Franse vrou het erken dat sy haar agt babas versmoor en hul lyke in die tuin en motorhuis versteek het, het 'n staatsaanklaer Donderdag gesê.
Die vrou is aangekla van van manslag.
Dominique Cottrez (46), 'n verpleegassistent, het gesê ná 'n slegte ondervinding met haar eerste swangerskap, wou sy nooit weer 'n dokter sien nie.
Sy het erken dat sy sonder enigeen se hulp gekraam en die babas se lyke in plastieksakke gesit het.
Sy het twee pasgebore babas in die tuin begrawe en die res in die motorhuis versteek, het Eric Vaillant, staatsaanklaer gesê.
"Sy het gesê sy wou nie nog kinders hê nie, en dat sy nie na 'n dokter wou gaan om voorbehoedmiddels te kry nie," het Vaillant gesê.
"Elke keer was sy bewus dat sy swanger is."
Cottrez en haar man, Pierre-Marie Cottrez, is Woensdag in hegtenis geneem ná die nuwe eienaars van die huis twee lyke in die tuin gevind het.
Die vrou is steeds in aanhouding en sal verdere psigiatriese toetse ondergaan.
Haar man is vrygelaat en nie aangekla nie.
Hy beweer hy het niks van sy vrou, wat baie geset is en maklik haar toestand weggesteek het, se swangerskappe geweet nie.
Die paartjie se twee volwasse dogters, wat in hul 20's is, is ondervra.
Volg Nuus24 op Twitter
- Sapa - AP