Vrees vir skietery laat universiteitsgebou ontruim
2011-03-17 20:00
Helsinki - Die polisie in Finland het Donderdag gesê hulle het ‘n universiteitsgebou ontruim ná vrese dat iemand aan die binnekant besig was om ‘n geweer te laai.
“Almal is ontruim en die polisie deursoek die gebou, maar geen konkrete bedreiging is nog opgemerk nie,” het Hannu Suokas, ‘n polisiewoordvoerder, gesê.
Verskeie mense het ‘n geluid in die gebou gehoor wat “geklink het soos ‘n geweer wat gelaai word”. Niemand het egter ‘n geweer gesien nie.
Finland, wat van die hoogste vlakke van geweereienaarskap in die wêreld het, het die afgelope paar jaar 'n vlaag massa-skietvoorvalle beleef.
In November 2007 het ‘n 18-jarige agt mense by ‘n hoërskool doodgeskiet voordat hy homself geskiet het.
Minder as ‘n jaar later, in September 2008, het ‘n kookkuns-student by sy opleidingskool ingestap en nege van sy klasmaats en ‘n onderwyser doodgeskiet voordat hy die gebou aan die brand gesteek en homself geskiet het.
Op oujaarsaand 2009 het ‘n 43-jarige sy eksmeisie doodgesteek en vier van haar kollegas in ‘n winkelsentrum doodgeskiet voordat hy homself geskiet het.
- Volg Nuus24 op Twitter
- Sapa - AFP