Vrae oor klub se veiligheidsmaatreëls ná brand
2013-01-29 12:27
Santa Maria – Die klub waarin meer as 200 Brasiliaanse kollegestudente in ‘n brand dood is, het geen alarm, brandblussers en byna geen uitgange gehad nie, het ondersoeke getoon.
Terwyl ondersoekbeamptes deur die puin werk en families oor geliefdes treur, het vrae aan die lig gekom oor hoe die brand, waarin 231 mense Sondagoggend in Santa Maria in die suide van Brasilië dood is, begin het.
Die ramp, die ergste van sy soort in meer as ‘n dekade, het ook gelei tot vrae oor Brasiliaanse beamptes se vermoë om mense se veiligheid in soortgelyke plekke te verseker wanneer die land die 2014 Wêreldbeker-sokkertoernooi en die 2016 Olimpiese Spele aanbied.
'n Voorlopige ondersoek het getoon dat die klub slegs een deur gehad het. Daar was ook vlambare materiaal in die dak wat toegelaat het dat die brand vinnig versprei.
Ondersoek word ook ingestel oor hoekom die musiekgroep toegelaat is om vuurwerke binne die klub te gebruik.
Die polisie vermoed die vuurwerke het die brand by die Kiss-nagklub begin.
Insp. Antonio Firmino, wat deel is van die ondersoekspan, sê dit wil voorkom of die klub se dak met ‘n laag skuim bedek was wat van ‘n vlambare materiaal gemaak is. Dié materiaal het tydens die vuurwerkvertoning aan die brand geslaan.
‘n Tweede deur in die klub was volgens Firmino “ontoeganklik” omdat dit klein was en nie kon oopmaak nie.
– Volg Nuus24 op Twitter
- Sapa - AP
