Vlugte tot Saterdag gekanselleer
2010-04-16 14:01
Kaapstad – Vlugte in die Noorde van Europa en Brittanje sal vir ten minste nog 24 uur deur die reuse-aswolk wat deur die vulkaanuitbarsting in Ysland veroorsaak is, ontwrig word .
Die Nasionale Lugverkeerdienste in Brittanje het gewaarsku dat vlugbeperkings ten minste tot eenuur Saterdagoggend sal duur, berig Sky News.
"Ons verwag omtrent 11 000 vlugte oor Europa vandag.
"Gewoonlik is daar omtrent 28 000 vlugte," het Kyla Evans, 'n woordvoerder vir Eurocontrol, gesê.
Die wolk beweeg steed oos en suid-oos.
Sekere vlugte uit Noord Ierland, Skotland en Prestwick sal egter tot vanaand toe wel kan plaasvind.
Slegs vyf vlugte, een na Kanada, het van Glasgow af vertrek.
Intussen is duisende reisigers in Frankryk gestrand.
Die meeste lughawens in die noorde van die land is deur die owerhede beveel om tot 18:00 vanaand te sluit.
Dié ontwrigting vind op die vooraand van Frankryk se skoolvakansie plaas en te midde van ‘n landwye spoorwegstaking.
Singapoer Airlines het ook vlugte na en van Europa en Brittanje gekanselleer.
Kenners het gewaarsku dat soortgelyke ontwrigting vir tot ses maande kan duur indien die vulkaanuitbarsting nie binnekort stop nie.
– Sapa / Reuters / AP