Vlugkelners beloon ná gefnuikte kaping
2012-07-10 13:45
Beijing – 'n Lugredery het vlugkelners, wat verlede maand 'n vliegtuigkaping gefnuik het, met geld en woonstelle beloon.
Ses Uighur-mans, waarvan twee intussen dood is, is in hegtenis geneem ná 'n poging om die vliegtuig in China se Xinjiang-streek te kaap. Vier vlugkelners is beseer nadat 'n bakleiery ontstaan het.
Hainan Airlines, moedermaatskappy van die vlugoperateur, het nege bemanningslede beloon met of 500 000 renminbi yuan (sowat R648 000), 1 miljoen renminbi yuan (sowat R1,2 miljoen) kontant, 'n woonstel ter waarde van 2 miljoen renminbi yuan (sowat R2,5 miljoen) of 3 miljoen renminbi yuan (sowat R3,8 miljoen) en 'n motor.
Die Xinhua-nuusagentskap het berig dat die bemanningslede ook geld van plaaslike regerings en China se lugvaartadministrasie ontvang. 'n Oorsese regtegroep het gesê die voorval was 'n geveg oor 'n sitplek en nié 'n kapingspoging nie.
– Volg Nuus24 op Twitter
- AP
