Vloedwater saai verwoesting in Australië
2010-12-29 11:46
Sydney - Australië se premier, Julia Gillard, het Woensdag gewaarsku dat "ongeëwenaarde" vloede selfs meer skade kon aanrig ná verskeie dorpe in die noorde van die land weens swaar reën van die buitewêreld afgesny is.
Honderde mense is deur soldate in helikopters van oorstroomde gebiede gered.
Gietende reën het groot dele van die staat Queensland onder water gelaat, met 1 000 ontruimingspogings en 38 streke wat tot rampgebiede verklaar is.
Gillard het 'n openbare oproep gedoen om bydraes vir noodlenigingsfondse, en het $1 miljoen (Amerikaanse dollar; sowat R6.6 miljoen) se regeringsfondse opsygesit om diegene wat die ergste onder vloede deurgeloop het, te help.
"Sommige gemeenskappe sien hoër vloedwaters as wat hulle in dekades gesien het, en in party gemeenskappe het vloedwaters nog nooit sulke vlakke bereik vir so lank as wat ons rekord hou van vloede nie," het Gillard aan verslaggewers gesê.
"Baie gemeenskappe het nog nie eens die hoogtepunt van die vloedwater gesien nie; dis nog 'n paar dae weg."
Honderde mense het uit hul huise gevlug in die kusstad Bundaberg, noord van Brisbane, en in die nabygeleë Emerald. Die dorp Theodore, geleë in Queensland, is heeltemal ontruim met die hulp van soldate in Black Hawk-helikopters.
Talle mense is dakloos gelaat en het oornag in noodsentrums, terwyl ander in mynkampe of by familie en vriende skuiling gesoek het.
Gillard sal in die volgende paar dae na gebiede reis wat deur die vloede geraak is.
- Volg Nuus24 op Twitter
- Sapa - AFP