Vloedmoeë Pakistan draai al meer teen president
2010-08-07 09:49
Sukkur – Gebiede wat reeds swaar getref is deur die ergste vloede in dekades kan nóg swaar reën verwag en die ramp vererger. Die gebeure werp ook twyfel oor die leierskap van pres. Asif Ali Zardari.
Minstens 1 600 mense is al dood in die vloede. Die nasionale rampbestuur-owerheid het gesê 12 miljoen mense in twee provinsies is geraak deur die vloede en syfers vir die suidelike provinsie Sindh is nog nie beskikbaar nie.
Die vloede het die publiek se woede teenoor ’n afwesige Zardari laat opvlam, wat ten spyte van die erns van die ramp voortgegaan het met staatsbesoeke aan Europa.
“Hierdie besoek is die lakmoestoets, en enige voordeel van die twyfel oor die president se leierskap het nou heeltemal verdwyn in die oë van die publiek,” het ’n radio-omroeper en rubriekskrywer, Fasi Zaka, gesê.
Die vloede het landboustreke oorstroom en die landbou-gebaseerde ekonomie ’n vernietigende knou toegedien.
Amerikaanse beamptes, bewus van die impak wat orkaan Katrina op oudpres. George W. Bush se gewildheid gehad het, het in privaatheid hul frustrasie uitgespreek met Zardari se weiering om terug te keer na Pakistan om die krisis die hoof te bied.
Zardari voer tans gesprekke met die Britse premier, mnr. David Cameron. Pakistani’s is egter nie beïndruk hiermee nie.
- Reuters