Vloede kan nog chaos in Haïti veroorsaak
2010-03-16 14:13
Port-au-Prince – Twee maande ná een van die ergste natuurrampe wat die wêreld nog getref het, staar die inwoners van Haïti die risiko van vloede in die gesig.
Sowat 1,3 miljoen mense is dakloos gelaat ná die aardbewing wat die land op 12 Januarie getref het.
Met die reënseisoen wat naderkom meen die Verenigde Nasies dat sowat 218 000 mense wat in 21 tentkampe in Port-au-Prince woon nou in gevaar is.
“Die probleem met die reënseisoen is dat dit ‘n baie vaag tydgrens het,” het Kristen Knutson, woordvoerder vir die VN se kantoor vir die koördinering van humanitêre kwessies (OCHA) gesê.
Die regering sukkel om land te koop om noodkampe buite die hoofstad op te rig, maar dit kan tot ses weke neem om behoorlike kampe hier op te rig en Knutson het bygevoeg dat dit ‘n laaste uitweg is om mense uit die hoofstad te skuif.
- Sapa-AFP