Vliegtuig van 1911 in ys gevind
2010-01-04 09:01
Sydney - Australiese ontdekkers het Sondag die bloumaan en ’n rekordlae gety krediet gegee vir die “naald-in-’n-hooimied”-ontdekking van een van die eerste vliegtuie wat in die Antarktiese ys begrawe is.
Dié eendekker was die eerste in die Vickers-produksielyn, skaars agt jaar ná die Wright-broers se geskiedkundige eerste vlug.
Die Vickers is in 1911 deur die Australiese ontdekker Douglas Mawson na Antarktika geneem.
Dit het in ’n oefenvlug in Australië neergestort, maar Mawson het die romp en die enjin met hom saamgeneem.
Hy het dit met spesiale ski’s en ’n roer op die stert toegerus en dit as ’n “lugtrekker” gebruik om sy sleë te trek.
Mawson het die vliegtuig in 1931 in Antarktika agtergelaat.
Drie agtereenvolgende bewaringspanne van die Mawson’s Hut Foundation het met magnetiese en ander toerusting probeer om die romp te vind wat laas in 1975 gesien is. Dit was toe byna heeltemal met ys bedek.
Die ongeëwenaarde kombinasie van historiese lae getye wat deur ’n bloumaan veroorsaak is, en die ongeëwenaarde smelting van ys het meegehelp tot die ontdekking op Nuwejaarsdag, het die Australiese omgewingsbewaarder David Jensen gesê.
“Dit was waarskynlik een kans uit ’n miljoen dat hierdie omstandighede saamgespeel en ons in staat gestel het om die ontdekking te maak.
“Een van ons bewaringstimmermanne het langs die kant van die hawe geloop en die stukkie metaal tussen die rotse sien uitsteek.”
Jensen het gesê die “ekstatiese” span het die fragmente van die romp versamel en sal dit waarskynlik einde vandeesmaand na Australië bring, waar dit die nodige aandag sal kry.
- Sapa-AFP