Vlieëniers ‘het nie geweet Air France 447 verloor hoogte’
2011-07-30 08:48
Parys. – Vlieëniers van Air France het gedeeltelik weens ’n gebrek aan opleiding ’n reeks foute begaan op vlug 447 van Rio de Janeiro na Parys, wat in 2009 neergestort en waarin 228 mense gesterf het.
Vlieëniers het versuim om korrek te reageer toe die Airbus-vliegtuig hoogte verloor het ná sy spoedsensors gevries en gefaal het, het die Franse lugvaart-owerheid BEA gister gesê.
Die verlies aan hoogte is “nie formeel geïdentifiseer nie” ten spyte van ’n alarm wat bykans ’n minuut lank gelui het, lui die verslag.
Air France het onmiddellik in ’n verklaring sy vlieëniers verdedig en gesê die alarm het wanfunksioneer.
Luidens die BEA-verslag het vlieëniers het nie besef dat die vliegtuig hoogte verloor het ná sy spoedsensors – bekend as Pitots – op die oornagvlug nie behoorlik gefunksioneer het nie.
Ná die ongeluk het Air France die Pitots, wat deur die Franse maatskappy Thales vervaardig is, met ’n nuwer model vervang. Beide Air France en Airbus word ondersoek vir beweerde manslag in verband met die ongeluk.
Dit was die derde formele verslag ná jare se ondersoeke oor hoe die Airbus neergestort het. Die BEA het bykans twee jaar geneem om die wrak van die vliegtuig en sy vlugopnemers te vind, asook heelwat lyke van slagoffers.
“Die BEA stel die feite vas en maak aanbevelings gegrond op daardie feite,” het die minister van vervoer en omgewingsake, Nathalie Kosciusko-Morizet, gister op die radiostasie RTL gesê. “Die howe moet besluit wie verantwoordelik is.”
– Die Burger
– Volg Nuus24 op Twitter.
- Sapa - AFP