Vlaag geweld in Bagdad eis meer as 70

2012-09-09 21:31

Bagdad – Drie motorbomme het laat Sondag in hoofsaaklik Sjiïtiese dele van Irak se hoofstad ontplof, en minstens 15 lewens geëis.

Altesaam 57 mense is ook in die aanvalle beseer, het veiligheidsbeamptes en mediese personeel gesê.

Die aanvalle was deel van 'n vlaag geweld oor Irak heen sedert laat Saterdag, wat meer as 70 lewens geëis het in 24 uur.

Minstens sewe mense is dood ná 'n motorbom by 'n mark in die Washash-gebied in die weste van die stad ontplof het. Altesaam 21 mense is in dié aanval gewond, het 'n amptenaar en 'n mediese beampte gesê.

Vyf mense is ook in die noorde van Bagdad dood en 22 gewond toe 'n motorbom naby 'n restaurant in Shuala ontplof het.

Die derde bom het in 'n sakegebied in Hurriyah ontplof. Drie mense is in dié bom dood en 14 gewond, het 'n mediese beampte en 'n staatsamptenaar gesê.

– Volg Nuus24 op Twitter.

- Sapa - AFP