'Virtuele kinderpornografie' oorweeg
2012-11-19 09:11
Den Haag – 'n Voorstel deur twee Nederlandse seksuoloë dat "virtuele" kinderpornografie in die land vervaardig en gewettig moet word, het 'n groot debat ontketen.
Rik van Lunsen en Erik van Beek, seksuoloë by die Amsterdam Universiteitshospitaal, het verlede maand voorgestel dat tekeninge en rekenaargrafika gebruik moet word om kinderpornografie te vervaardig, sodat pedofiele hulle behoeftes kan bevredig.
"As jy virtuele kinderpornografie vervaardig onder streng beheer van die regering met een of ander soort etiket wat verduidelik dat geen kind gemolesteer is nie, gee jy pedofiele 'n manier om hulle seksuele drange te reguleer," het Van Beek aan die nuusagentskap AFP gesê.
Hy het vir 'n openbare debat oor die onderwerp gevra.
Virtuele kinderpornografie, wat die gebruik van tekeninge of rekenaargrafika insluit, is in 2002 onwettig verklaar, toe fotorealistiese rekenaarwerk al hoe makliker geword het om te vervaardig.
In Nederland kan die besit van dié soort kinderpornografie, net soos met "gewone" kinderpornografie, lei tot tronkstraf van tot vier jaar.
"Ek dink wanneer jy jou fantasieë onderdruk kan dit lei tot frustrasie en, eindelik, veral vir sekere soorte pedofiele, kan dit lei tot 'n groter kans dat hulle iets verkeerd doen," het Van Beek gesê.
Ongeveer 1% van die Nederlandse bevolking van 16,5 miljoen het pedofiliese neigings, maar slegs 'n klein persentasie van dié mense sal 'n kind molesteer, het Van Beek gesê.
Die twee seksuoloë se voorstel het 'n groot debat in die Nederlandse media ontketen.
"Dis regtig nie 'n goeie idee nie," het Gerdi Verbeet, voormalige parlementêre speaker, gesê.
– Volg Nuus24 op Twitter.
- Sapa - AFP
