Vigsdag-troue gestop
2009-12-01 11:02
Buenos Aires - Hulle het ‘n troudag beplan soos Argentinië nog nooit gesien het nie.
Maar terwyl Jose Maria Di Bello en Alex Freyre nog hulle troupakke aangepas het, het ‘n regter besluit om Argentinië se eerste gay troue Dinsdag in die wiele te ry.
Di Bello en Freyre het besluit om in elke geval by die registrasiekantoor op te daag vir die troue nadat ‘n ander hof hulle aansoek glo vroeër goedgekeur het.
Sou dié twee verhoed word om te trou sal hulle ‘n reuse-optog in die straat hou wat spesiaal afgekamp is deur owerhede ter voorbereiding vir die media-spektakel wat na verwagting rondom hulle troue sal losbars.
“Hulle is geskok en hartseer oor die nuus, maar hoop steeds dat hulle troue sal kan voortgaan,” het Maria Rachid, president van Argentinië se federasie vir gays en lesbiërs, gesê.
Regter Marta Gomez Alsina het beveel dat die troue stopgesit word totdat die hooggeregshof ‘n uitspraak rakende die kwessie gemaak het.
Di Bello en Freyre is albei MIV-positief en het juis daarom besluit om te trou op Wêreldvigsdag.
“Ons is verlief en opgewonde om te trou maar ons kan nie nou dink oor die partytjie of die wittebrood nie. Ons is aktiviste en ons kan nie vergeet van dit wat ons teenwoordig nie.”
Die paartjie het besluit om regshulp in te win nadat hulle in April vanjaar verhoed is om met mekaar te trou.
– Sapa, AP