Viëtnam: Polisielede vas wat man doodslaan

2012-09-04 07:31

Hanoi – Vier polisiebeamptes is in hegtenis geneem ná 'n 54-jarige man doodgeslaan is toe 'n muur by sy huis in Hanoi teen sy sin afgebreek is, het owerhede Dinsdag gesê.

Huynh Ngoc Tuyen, adjunk-polisiehoof van die Kim No-kommune in Hanoi, en drie ander beamptes is in hegtenis geneem na die dood van Nguyen Mau Thuan, het Tran Hai Quan, 'n polisiehoof van die distrik, gesê.

'n Voorlopige ondersoek verlede week het getoon dat plaaslike owerhede 'n baksteenmuur verwyder het wat onwettig deur die slagoffer se pa opgerig is.

Thuan het die owerhede teengestaan en 'n baksteen gegooi na 'n vrou wat by die werk betrokke was, het die aanlyn-koerant Vnexpress berig.

Amptenare het Thuan daarna aangerand en gedwing om skuld te erken, maar hy het geweier. Hy is dood na twee ure in polisie-aanhouding. Hy het drie gebreekte ribbes gehad.

– Volg Nuus24 op Twitter.

- SAPA