Vierling werk saam as verpleegsters
2010-02-17 19:30
Seoel – ‘n Vierling het saam as leerder-verpleegsters by ‘n hospitaal waar hulle gebore was, begin werk.
Dít kom ná ‘n belofte wat die hoof van die hospitaal 21 jaar gelede aan hul ma gemaak het, het ‘n beampte Woensdag gesê.
Hwang Seul, Hwang Seol, Hwang Sol en Hwang Mil, die land se tweede vierling, was in Januarie 1989 by die Gacheon University Gil-hospitaal in Seoel gebore.
Hierdie week het hulle vir die eerste keer na die hospitaal teruggekeer sedert hul geboorte, om as proef verpleegsters te begin werk, het die hospitaal se woordvoerder gesê.
Lee Gil-Ya, voorsitter van die hospitaal, het in 1989 ingestem om die vierling se ma by die hospitaal op te neem, nadat ander klinieke haar weggewys het. Die babas was deur middel van ‘n keisersnee gebore.
Lee het die mediese onkostes verbonde aan die geboorte laat vaar en belowe om hul toelaes vir verdere studies te betaal, en aan hulle werk as verpleegsters te gee, indien hulle die staat se eksamen slaag.
Ten spyte van geldelike probleme het die vier susters verlede week saam-saam hul eksamen geslaag.
- Sapa-AFP